Илк ўрта асрда Суғдиёнада кумушдан ясалган қимматбаҳо идишлар ишлаб чиқариш ривожланган. Кумуш буюмлар безаги учун алоҳида услублар ишлаб чиқилган.
Қадимий ва ўрта асрлар шарқ кумушининг ноёб тўпламларидан бири Эрмитажда сақланади. 1909 йилда Шарқ кумуш идишларининг Эрмитаж коллекцияси Я.Смирновнинг “Шарқ кумуши” харитасида нашр этилган.
Суғд маданиятида кумушдан ясалган бадиий идишлар ишлаб чиқариш V-VI асрларда ҳудудда юзага келган “шаҳар” инқилоби билан боғлиқ бўлган. Шу вақтгача Суғдиёна бутунлай қишлоқ хўжалиги мамлакати бўлган, ҳунармандчилик асосан маҳаллий истеъмолчилар эҳтиёжларига қаратилган. Шаҳарлар кўпайиб бориши билан ҳунармандчилик қишлоқ хўжалигидан ажрала бошлаган ва ҳунармандлар сони ортиб борган.
Суғдийлар кундалик турмушда қимматбаҳо металлардан ясалган идишлардан фойдаланган. Буни Панжикент ибодатхоналаридан топилган V асрга оид кумуш идиш ҳам кўрсатиб турибди.
Панжикентнинг суғд тасвирий санъати олтин ва кумушдан ясалган идишлар тасвирлари билан тўла, тасвирланган идишлар ҳозиргача сақланиб қолган кумуш идишлар билан бир хил кўринишга эга. Бироқ суғдийларнинг асл олтин идишлари топилмаган, кумуш идишлар эса айнан қаерда ясалгани маълум эмас. Шубҳасиз, уларнинг маълум қисми пойтахт Самарқандда ишлаб чиқарилган. Идишларни ясаш учун хом аёш сифатида Ўрта Осиёда қазиб олинган кумушдан ва кумуш тангалардан фойдаланилган. Фарғона ва Ироқдаги, Нурота тоғларидаги кумуш конлари машҳур бўлган, шунингдек, Карнабдан ва ҳатто Миёнқалъадан ҳам кумуш қазиб олинган, қолаверса, қадимги Кумушкент қишлоғи бежизга бу номни олмаган.
Ўша даврда суғдийлар санъатига тегишли бўлган идишлар, хусусан, 8 бурчакли кружкалар машҳур бўлган. Нақшларида хитойлик усталарнинг кандакорлигига узвий равишда Эрондан кириб келган ток навдалари шаклидаги мураккаб ислимий безакларни кўриш мумкин. Хусусан, Тан усталари услубида ишланган, панжасини кўтариб, гералдик ҳолатда ўтирган шер тасвири Суғд лаганларига хос идиш сақланиб қолган.
Суғдийлар идишлари илк ўрта асрлар жамиятлари аслзодаларига мансуб бўлиб, кумушларда қўшни халқлар санъатининг муҳим ютуқлари ўзлаштирилган ва ижодий қайта ишланиб суғдий санъатининг синкретизми намоён бўлган.
