Варшава музейидаги ўзбек заргарлик санъатининг 3 ноёб намунаси

Варшавадаги Осиё ва Тинч океани музейи коллекциясида ЎЗБEК ЗАРГАРЛИК САНЪАТИНИНГ 3 ТА НОЁБ НАМУНАСИ сақланади. Улар ХIХ–ХХ асрларга оид.

БОДОМОЙ тақинчоғи. Коллекцияда энг қимматлиси бўлиб, Хива заргарлик санъатига хос. Чаккага тақилади. Бодомой шаклининг тарихи исломгача бўлган даврларга тўғри келади ва бир пайтлар янги турмуш қурганлар сиғинган, ҳосилдорлик маъбудаси Анахита номи билан боғлиқ. У учта бодом шакли ва унинг асосида жойлашган ярим ойдан иборат.

ПАНЧПОЯ СИРҒАСИ. Болғалаб тайёрланган, тилла суви юргизилган, қисқичи қалин кумуш ёки олтин симдан ясалган. Яшил ва пушти рангдаги бешта қимматбаҳо тошдан иборат. Бу дона-дона безак берилган нозик маржонлар билан кетма-кетлик ҳосил қилувчи турмалинлар ва хира тусли яшил бериллардир.

ТУМОР. Қуръон оятлари ёзилган қоғоз ўрамларини сақлаш учун ишлатилган. Филигранли нақшлар билан тўлиқ қопланган. Тақинчоқ шакли Исломгача бўлган даврда яратилган ва бугунгача машҳур учбурчак туморларга жуда ўхшайди.