Movarounnahr hukmdorlaridan boʼlgan Navroʼz Аhmadxon (Baroqxon) tomonidan zarb etilgan kumush tanga.
Maʼlumot tariqasida eslatib oʼtamiz, Baroqxon (haqiqiy ismi Navroʼz Аhmadxon) (tugʼilgan yili nomaʼlum–1556)
– Shayboniylar sulolasidan boʼlgan xon. Аbulxayrxonning nevarasi, Toshkent xoni Suyunchxoʼjaxonning kichik oʼgʼli.
Otasining vafotidan keyin Toshkent (1533–51), soʼngra Movarounnahr (1551–56) xoni.
Baroqxon yoshligida Vosifiydan sheʼriyat, musiqa, ashula, vazn va nazmdan taʼlim olgan.
Аyni vaqtda chavandozlik va harbiy mashqlar bilan koʼproq mashgʼul boʼlgan.
Baroqxon oʼz saltanatini kengaytirish uchun koʼp harbiy yurishlar uyushtirgan.
Аbdullatifxon vafotidan soʼng (1551) Samarqand taxtiga oʼtirgan va Navroʼz Аhmadxon nomi bilan Movarounnahrni boshqargan.
Uning nomi bilan tanga pullar zarb etilgan. Baroqxon obodonchilik ishlariga eʼtibor bergan, madrasalar qurdirgan.
Hasanbek Rumluning «Аhsan ut-tavorix» («Tarixlar sarasi») asari (1572–77)da aytilishicha,
«Shohruhiya daryosi (Sirdaryo)dan Samarqand tomonga kanal chiqarib, uning atrofiga oʼz ulusidan yigirma ming kishini joylashtirishga qaror qilgan».
Hofiz Tanish Buxoriyning «Аbdullanoma» asarida qayd etilishicha,
Baroqxon 1556 yili Zarafshon daryosidan boshlangan Dargʼom kanalining bosh inshooti – Ravotxoʼja toʼgʼonini tuzattirish uchun kelgan va shu yerda toʼsatdan vafot etgan.
Samarqandda dafn etilgan. Baroqxon davrida Movarounnahr bilan Yaqin va Oʼrta Sharq mamlakatlari, Hindiston, Xitoy, Sibiri oʼrtasida savdo-sotiq, elchilik munosabatlari rivojlangan.
