Bugun, 14-may kuni, akademik, tarix fanlari doktori, arxeolog, tarixchi, numizmatika, madaniyat va san’at sohasidagi a’lo mutaxassis Edvard Vasilyevich Rtveladze 82 yoshga to‘lgan bo‘lardi.
U arxeolog olim sifatida mamlakatimiz janubidagi qadimiy manzilgohlarni o‘rganib, O‘rta Osiyo mintaqasi tarixi va madaniyatining ulkan qatlamlarini, Buyuk Ipak yo‘lining eski va yangi yo‘llarini chuqur anglagan. Uning arxeologik tadqiqotlari, qadimiy yozma va moddiy yodgorliklarni o‘rganish natijalari O‘zbekistonda va xorijda nashr etilgan 800 dan ortiq ilmiy asarlarning yozilishiga asos bo‘ldi.
“O‘zbekiston madaniy merosi jahon to‘plamlarida” xalqaro multimedia loyihasi yaratilgan birinchi kundan boshlab (2016-yil) uning ilmiy rahbari, butun dunyodan mutaxassislarni loyihaga jalb etishga o‘z nufuzi bilan hissa qo‘shgan olim Edvard Vasilevich edi.
Ilmiy faoliyati uchun Edvard Rtveladze 1985-yilda “Beruniy” nomidagi O‘zbekiston Davlat mukofoti, 2001-yilda “Buyuk xizmatlari uchun” ordeni, 2003-yilda “Mehnat Shuhrati” va 2017-yilda “El-yurt xurmati” ordeni bilan taqdirlangan.
O‘tgan yili Toshkentda O‘zbekiston madaniy merosi haftaligi doirasida “Edvard Rtveladze xotirasiga” nomli xotiralar kitobining taqdimoti ham bo‘lib o‘tdi.
"Agar siz Edvard Vasilevichning barcha xilma-xil yutuqlarida birlashtiruvchi narsani topishga harakat qilsangiz, ehtimol, uning hayotining mazmuni umumiy manfaatlar uchun insoniyatga fidokorona xizmat qilishdir", - deb ta'kidlaydi kitob tuzuvchilari.
Olim mintaqamiz tarixiga bag‘ishlangan o‘nlab kitob va monografiyalar, O‘zbekiston tarixiga beqiyos hissa qo‘shadigan kashfiyotlarini kelajak avlodlarga meros qilib qoldirdi. Bu shaxs ilm-fanga fidokorona xizmat qilishning yorqin namunasidir.
