O‘zbekistonda 3 yirik — Samarqand, Buxoro va Xiva shaharlarida joylashgan muzey qo'riqxonalari mavjud...

Muzey-qo‘riqxonalar ma’lum hududdagi muzeylar bazasida tashkil etilib, mamlakat yoki mintaqaning tarixiy-madaniy va tabiiy merosini saqlab qolish uchun muhim bo‘lgan me’moriy, tarixiy va tabiiy yodgorliklarni o‘z ichiga olgan ochiq osmon ostidagi muzeyning bir turi hisoblanadi. Ushbu yodgorliklarni himoya qilish uchun davlat bunday muzeylarga qo‘shimcha ravishda qo‘riqxona huquqiy maqomini beradi.
Muzey-qo‘riqxonalar hududlarni, ansambllarni, majmualarni hamda tarix, madaniyat va tabiatning alohida yodgorliklarini muzeylashtirish asosida tashkil etiladi. Qo‘riqxona maqomi unga kiritilgan hududlarni va ob’yektlarni saqlash va ulardan foydalanishning maxsus usullarini o‘z ichiga oladi.

Muzey-qo‘riqxonalar tarixiy-badiiy, tarixiy-me’moriy, tarixiy-arxeologik, tarixiy-madaniy, harbiy-tarixiy, adabiy-memorial, ilmiy-texnik, ishlab chiqarish yo‘nalishlarida tashkil etiladi. O‘zbekistonda birinchi muzey-qo‘riqxonalar XX asrning 80 yillarida tashkil etilgan. Bular Samarqand, Buxoro va Ichan qal’a (Xiva) muzey qo‘riqxonalaridir.

Vazirlar Mahkamasining 2019 yil 30 maydagi “Sarmishsoy”, “Shahrisabz”, “Termiz” va “Qo‘qon” davlat muzey-qo‘riqxonalari faoliyatini tashkil etish to‘g‘risida”gi qaroridan so‘ng respublikamizdagi muzey-qo‘riqxonalar soni yettitaga yetdi. Albatta, bu madaniy meros obidalarini saqlash yo‘nalishida muhim qadam hisoblanadi.