Shimkent shahridagi Turkiston viloyati tarixiy olkashunoslik muzeyi o‘z kolleksiyasini noyob sovg‘a – "O‘zbekiston madaniy merosi jahon to'plamlarida" loyihasining 50 jildlik kitob-albomlari bilan boyitdi.
Bu noyob sovg‘a O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyati (WOSCU) tomonidan xalqaro hamkorlik doirasida taqdim etildi. Ushbu kitoblar seriyasi tarixiy artefaktlar to‘plami bo‘libgina qolmay, balki O‘zbekistonning boy tarixi, sanʼati, meʼmorligi va anʼanalari bilan tanishish imkoniyatini beradigan fotosuratlar, tavsiflar va tadqiqotlarni o‘z ichiga olgan qimmatbaho hujjatdir.
WOSCU va Turkiston viloyati tarixiy olkashunoslik muzeyining birgalikdagi saʼy-harakatlari natijasida XIX-XX asr oxirlari va zamonaviy tasviriy sanʼatning eng yaxshi namunalariga bag‘ishlangan "O‘zbekiston madaniy merosi Qozog‘iston va Qirg‘iziston muzeylarida" nomli kitob-albom chop etildi.
WOSCU kelajakda muzey bilan hamkorlikni davom ettirishni, shuningdek, madaniy almashinuv va tarixiy asrab-avaylash sohasidagi yangi loyihalarni intiqlik bilan kutmoqda.
