Бухорода зардўзлик ва заргарлик санъати халқаро фестивали бўлиб ўтмоқда
Зардўзлик ва заргарлик фестивалида республикамизнинг барча вилоятларидан 200 дан ортиқ ҳунармандлар иштирок этмоқда.
Улардан 110 нафар заргар, 37 нафар зардўзлик устаси, 44 нафар каштачи, 97 нафар иштирокчи ҳунармандчиликнинг турли йўналишлари билан шуғулланади. Фестивалга дунёнинг 58 давлатидан иштирокчилар ташриф буюрган.
Тадбирдан кўзланган асосий мақсад – кўп қиррали ўзбек миллий ҳунармандчилигини кенг намойиш этиш, бу борада халқлар ўртасида тажриба алмашишни йўлга қўйиш, дўстлик ва ҳамкорликни янада ривожлантиришдан иборат.
Фестиваль доирасида “Анъанавий зардўзлик ва заргарлик санъатининг ривожланиш истиқболлари” мавзусидаги илмий-амалий конференция бўлиб ўтади, унда дунёнинг 22 давлатидан 33 нафар хорижлик олим ва 20 нафар ўзбекистонлик олимнинг иштирок этиши кутилмоқда.
