Таъкидлаш жоизки, Франциядан келган мутахассиснинг конгресс иштирокчиси бўлиши биринчи марта эмас ва бу гал «Ўзбекистон маданий мероси замонавий илм-фан диққат марказида» халқаро илмий конференцияси доирасида у «Француз тўпламларида Ўзбекистон ва Марказий Осиё қўлёзма манбалари» маърузаси билан иштирок этмоқда.

– Конгрессда бешинчи марта иштирок этяпман ва ҳар сафар у мени бирор жиҳати билан ҳайратда қолдиради. Ушбу конгресс бу ерда тақдим этилган нашрлар ва илмий мақолалар ҳажми билан мени ҳайратга солди. Маданий меросга оид бунчалик кўп илмий нашрларни тўплаш мумкинлигига ишонмас эдим.

Францияда Ўзбекистоннинг маданий мероси ҳақида бир жилдлик асар тайёрладим. Шу билан бир қаторда, нафақат Ўзбекистон, балки бутун Марказий Осиёнинг маданий мероси ва панорамасини жаҳон ҳамжамиятига кўрсатиш учун яқин келажакда тақдим этмоқчи бўлган бошқа ишларни ҳам тайёрлаяпмиз.
Яна шуни айтмоқчиманки, мен Самарқандга яна ташриф буюрганимдан ва кўплаб ҳамкасбларим билан учрашганимдан жуда хурсандман, чунки дунё бўйлаб кўплаб ҳамкасбларим бўлгани каби улар орасида ўзбекистонлик ҳамкасбларим ҳам бор.

Мен қайтишни интиқлик билан кутгандим, негаки бу ҳамкорлик шижоатга асосланган ва мана шу эса қувонтиради.
«Ўзбекистон маданий мероси жаҳон музейлари коллекцияларида» лойиҳаси ҳақида гапирар эканман, шуни айтмоқчиманки, Ўзбекистонда мустақиллик эълон қилингандан сўнг порлашни хоҳлайдиган, четда туришни истамайдиган янги авлод етишиб чиқди.

Лекин бунинг учун улар ўзларининг буюк ўтмишларини билишлари керак, чунки Уйғониш жараёнининг ўзи эскиси асосида янги нарса қуриш демакдир, шунинг учун уларнинг бой тарихини билиш ва кўриш бунга катта ҳисса қўшади ва Ўзбекистоннинг янги авлодига янги келажак қуришга ёрдам беради.