Ўзбекистон маданий меросини ўрганиш, асраш ва оммалаштириш бўйича Бутунжаҳон жамияти раиси, Ўзбекистондаги Ислом цивилизацияси маркази раҳбари Ф. Абдухаликов бошчилигидаги делегациянинг Буюк Британияга расмий сафари режалаштирилган.
Ислом цивилизацияси маркази Ахборот хизмати хабар беришича, ташриф доирасида делегация аъзоларининг Лондондаги йирик коллекционерлар ва маданий мерос соҳасида фаолият юритаётган таниқли шахслар — Сарухани, Халилий, Билол Судчи, Довудшоҳ каби дилерлар билан учрашувлар белгиланган.
Сафарнинг асосий мақсадларидан бири юртимизга оид қимматли тарихий артефактларни Ватанга қайтариш бўйича халқаро ҳамкорликни мустаҳкамлашдир.
Шунингдек, Sotheby’s ва Christie’s каби нуфузли аукцион уйлари орқали харид қилинган экспонатлар иштирокида Лондонда махсус кўргазма ўтказилиши кўзда тутилган. Кўргазмада Ўзбекистон тарихига дахлдор 80 дан ортиқ ноёб артефакт намойиш этилади.
Бу каби халқаро ҳамкорликлар Ўзбекистоннинг маданий меросини тиклаш ва уни жаҳонга танитишда муҳим аҳамият касб этади. Юртимиз иқтисодиётининг барқарор ривожланиши ва давлат сиёсатида маданий меросга қаратилаётган эътибор туфайли тарихий бойликларимизни қайтариш учун кенг имкониятлар яратилмоқда.
Халқаро нуфузга эга Sotheby’s ва Christie’s аукцион уйлари ҳар бир экспонатнинг ҳақиқийлиги ва тарихий қимматини тасдиқловчи жаҳон стандартларига мувофиқ экспертиза тизимига эга бўлиб, харид қилинган ҳар бир артефакт учун беш йиллик кафолат тақдим этади.
Аввалроқ мазкур делегация жорий йилнинг 25 апрелидан 2 майига қадар Буюк Британияга ташриф буюриб, аукцион уйлари билан танишган ва Ўзбекистон маданий меросига оид 60 га яқинг лот саралаб келган, шунингдек, коллекциянерлар билан учрашувлар ўтказган эди.
